Indijana je povela 1:0 u finalnoj seriji NBA lige, nakon što je savladala Oklahomu na gostujućem terenu 111:110. Prevagu su odnijele mnogo bolja treća i četvrta četvrtina Pejsersa, a naročito sama završnica meča, pošto Indijana nije povela tokom cijele utakmice, već svega tri stotinke prije kraja susreta.
Indijana je preokretom u posljednjih minut i 22 sekunde uspjela da zabilježi prvi trijumf u seriji i pritom rivalu ne dozvoli poene do kraja meča. Činilo se da je Oklahoma na dobrom putu da opravda prednost domaćeg terena, pošto je na minut i po do kraja susreta imala blagu prednost od 110:106. Međutim, uslijedila je serija rivala za koju su bila zaslužna dvojica lidera – Tajris Halibarton i Paskal Sijakam.
Oklahoma do kraja susreta nije postigla nijedan koš, pa je pitanje pobjednika bilo jasno. Ipak, sve je tokom ostalih skoro 48 minuta izgledalo drugačije, Oklahoma je preuzimala inicijativu, a svoj standardni doprinos imao je Šej Gildžes-Aleksander koji je već u prvih 12 minuta imao isto toliko poena, mada njegovi procenti šuta već tad nisu bili sjajni, jer je za dva poena pogodio četiri puta iz 11 pokušaja. Indijana je nekako uspijevala da održi relativno mali zaostatak, sve dok Lugenc Dort u 19. minutu nije vezao tri trojke (50:37) i momentum u potpunosti prenio na stranu Oklahome. Igralo se koš za koš u nastavku, pa je tako domaćin imao značajnu prednost na poluvremenu.
Poslije velikog odmora, timovi su do same završnice treće dionice igrali koš za koš, a onda su Tomas Brajant i Sijakam kombinovano ubacili po trojku, pa je Indijana imala jednocifren zaostatak i napokon je ponovo bila u igri. A, onda je uslijedila odlučujuća četvrtina u kojoj su gosti slavili 35:25, pogodili su četiri trojke, dok Oklahoma nije nijednu i pritom je domaćin koševe davao pretežno sa linije penala, zbog čvrste odbrane rivala. Mada i pored takve igre Oklahoma je imala prednost sve do same završnice, a tada je Halibarton preko Kejsona Valasa tri stotinke prije kraja meča donio prvo vođstvo Indijani u susretu i samim tim vođstvo u finalnoj seriji.
Najefikasniji na meču je bio Šej Gildžes-Aleksander sa 38 poena, dok u Indijani nijedan igrač nije imao tako zapažen učinak, već su oni svoje poene podijelili na tim. Tako je čak šestorica igrača imala dvocifren broj poena poslije meča, među njima najefikasniji je bio Sijakam sa 19 poena i 10 skokova, potom Obi Topin sa 17, Mejlis Tarner je postigao 15, a Halibarton i Andre Nembhard po 14, odnosno Eron Nesmit.
Kako se igra NBA finale?
Pobjednik finalne serije biće ekipa koja prva dođe do četiri pobjede. Sljedeći mečevi su na programu:
- 9. 6. u 2 (domaćin Oklahoma)
- 12. 6 u 2.30 (domaćin Indijana)
- 14. 6 u 2.30 (domaćin Indijana)
- 17. 6 u 2.30 (domaćin Oklahoma)
- 20. 6. u 2.30 (domaćin Indijana)
- 23. 6 u 2 (domaćin Oklahoma)
